註：由於小魚無帶相機，所有相片均以手提電話拍攝，如相片質素不佳，懇請原諒。
今日約左以前IVE一班舊同學出黎去錦田燒野食，好鬼正呀，環境有田園氣息之餘d野食又特別~~
出席既有我小魚、Andy、阿Man同佢兩個親戚、妹妹仔、Fanly同佢老公阿山、Geedy、Tina同佢法藉男友﹝唔知個名點串添﹞...
我地事前唔知 Tina 既男友﹝應該係未婚夫至啱﹞原來係法國人，原來佢放兩星期假黎香港陪 Tina 過年......
哈哈...法國人d英文唔係咁純正，我地同佢都唔係好識溝通，真係慚愧...
法國人果然係浪漫d，兩口子行開一邊手拖手喃喃細語，大家見佢地咁鬼纏綿都唔敢打擾佢地...
有生活品味既法國人，燒隻雞翼都要燒到靚一靚至放落口食，仲要同 Tina 研究一番！
可能我地無買 table wine 招呼佢，佢兩個坐左一個鐘左右就有下場要先走，哈哈...下次要買多枝紅酒入黎！
阿Man話佢燒野食唔叻但焗野就好掂喎，睇下我地買既磨菇同佢地親手用錫紙包既牛油粟米：
仲有荔灣街市出面生果檔買既十蚊三盒超抵士多啤梨，都幾甜架：
我走左去園主個田園度八卦下，好鬼多菜呀，前面淺綠色呢d係未成形既西蘭花：
前面大大個既係椰菜花，後面既就係生菜：
好大塊蘿蔔田，Fanly姐成日嚷著要摘蘿蔔......
打邊爐成日食既油墨菜，成塊田既油墨菜你見過未？
屋企附近既瓜棚種滿水瓜...
睇下個水瓜幾大個....
仲有木瓜樹添，最右手邊已經熟左黃色果個應該好正，人地話樹上熟既木瓜好甜架喎......
呢d咁得意既花，園主話係菜黎架喎，d菜謝晒之後會出花架喎...咁奇特？
除左植物之外仲有動物架...上次黎都見過既山羊，而家只剩番兩隻乍...
好可愛既白兔仔，隔住鐵絲網四圍望：
睇下佢地鑽既地洞，幾大個....
有一隻黑色耳仔黑眼睛個身有斑點架，唔知係咩種呢......
近鏡睇真d，幾鬼得意：
仲有d細隻架，園主話三隻大既其中兩隻生左五隻小兔喎...小兔肥嘟嘟好可愛喔！
睇完園主d動植物，返去燒左一陣野食，閒聊下，又跟園主走左上對開既小山丘，有幸見到日落添！
我地途徑一條小徑，園主話村民因朝早經常晨運，將佢命名為晨運路：
走過峻峭既山坡，上到山頂，整個錦田既景色一覽無遺：
好靚既日落呀...幾大個鹹蛋黃：
眼見快要入黑，大家逗留左一陣就落山，行山消耗左d energy又有點肚餓，後又可以繼續燒野食啦~~~
Fanly 見人地去摘蘿蔔佢又話要摘，終於俾佢摘到個大蘿蔔，正宗既新界蘿蔔應該好甜既，我地一陣拎去打邊爐：
夜晚入黑後d野食差唔多燒晒，天氣又涼涼地，我地問園主借左個煲，將d剩餘物資拎晒黎打邊爐！
哈哈......就咁拎幾舊磚頭搭起就可以放個煲上去滾野食，o係燒烤爐上打邊爐你又試過未？下面果d真係炭火黎架......
拿拿拿...正嗎？燒剩既芝士腸、龍蝦丸﹝白色兩粒﹞，仲有菜，仲有 Fanly 頭先摘既蘿蔔﹝沈晒o係底影唔到﹞......
大家圍住個爐一邊食一邊閒聊，大約九點半左右至執野離開，BBQ + 火鍋真係好鬼正~！
