今日係初一，行左個大運，今年有運行啦卦~~~~~

朝早九點同屋企人一齊出門口拜年，目的地係粉嶺。

我地當然係諗住去上水轉火車啦，但為左搭巴士定小巴呢個問題都搞左好耐......

起初落到小巴站諗住搭小巴，但眼見小巴滿座又話要行過去巴士站等巴士，行到去巴士站望到小巴仲有位又話要行返去搭小巴...

來來回回左幾次最後都係搭小巴，廿分鐘後去到上水轉火車，五分鐘後已經o係粉嶺火車站~~~

落到粉嶺火車站，媽子話佢約左五舅父o十點半係呢度等，但係等左成十分鐘過晒十點半都未見人，大家都開始焦急......

阿妹提議打舅父手提電話問下佢o係邊，點知媽子話個手提電話號碼漏左o係企無帶！

咁...唯有打電話俾表妹問下舅父個電話號碼啦，點知佢話舅父同舅母個手提電話都cut左！

又一次既失望，大家唯有繼續等，等到十一點，大家都好唔耐煩兼有d腳軟，我地決定唔等佢地上三舅父度先...

行到半路，五舅母打電話黎話佢地一家三口而家o係火車站，問我地點解唔等埋佢，阿妹無名火起話佢："而家幾點呀，我地等左你半個鐘啦，你而家至出現仲話我地唔等你！"

無可奈何之下唯有等埋佢地，佢地一黎到藉口就話表弟唔肯出口至搞到咁遲喎...

上到三舅母果度，阿妹同佢表哥因為有生意來往入左房密密針，而阿爸阿媽就同舅父舅母寒喧一番，我坐o係梳化悶到幾乎訓著......

十二點佢地終於都捨得走，我地搭番火車落沙田新城市廣場搵野食，但係...行左好耐都無乜心水...

去酒樓又要等位，西餐老豆又唔食，d食上海菜既又未開門，真係唔知食乜好...

最後行左落地下求其搵左間茶餐廳坐低食算數......

食飽之後去下一站，沙田第一城同伯父拜年，去到新城市廣場巴士站老豆話搵唔到80K個巴士站喎！

最後上左架86K，但係車費要成$4.6，老豆手快快就拍左八達通上左車，我唯有跟住上啦，但真係好唔抵呀...

呢度搭的士落第一城都唔跳錶既，除開每人都係$3.x乍嘛...而家計落仲貴過搭的士！

算啦，上到伯父果度拜年，又係閒聊幾句，坐左一陣就走，接住落黎老豆話返屋企先，我同媽子阿妹繼續去下一站 -- 小熊國。

之前睇報紙雜誌剪左三張coupon全部唔駛錢入場，我有心入去買隻小熊掛o係個新袋度架...

好難得見到咁大隻玩具熊，既然黎到，梗要影番d相啦......

行左個圈都好似無乜心水，問番個sales至知原來最細既熊仔都有成六吋......

正當我感到有d失望之餘，阿妹提議入機動遊樂場踫下運氣，果然見到有夾熊仔機，d熊仔size仲好岩心水添，阿妹玩左兩次就已經夾左上黎！

掂啦，用左三個代幣就夾左兩隻，我total換左四十蚊，剩番果d代幣就當獎勵佢拎去玩其他遊戲~~~

返出黎既時候已經七點幾，大家都好累，仲有d肚餓，去左Starbucks，我同媽子都左杯Latte同Tiramatsu，阿妹就叫朱古力蛋糕同熱朱古力。

嘩...媽子一邊食Tiramatsu一邊讚好味，仲話要食多件，點知飲埋杯Latte就話飽到乜都食唔落~~~

食飽左返到屋企飽到連飯都食唔落，仲好眼訓添...zzzzz 年初一已經兜晒圈行大運......