今日係廣州地鐵二號線試營運通車既日子。
今朝起身梳洗換衫，執埋d野，十一點就已經落酒店大堂退房，離開酒店搭的士準備同一班好友會合。一落車已見到公園前站既入口處掛上"熱烈慶祝廣州地鐵二號線首段開通"既橫額，唔少人聚集在入口處，期待住下晝二點乘坐二號線既第一班列車。
我地約好左十二點公園前站等，集合後一行六人行去北京路Pizza Hut食Pizza，呢度Pizza
Hut出左款聖誕Pizza香港無既，我地夾埋叫左兩個大批，一個法式焗蝸牛同埋一個意粉，仲有座檯月曆送添！
飯後大家都懷著興奮既心情，向著廣州地鐵一、二號線既交匯站—公園前站進發。
我地落到地鐵站未夠兩點，二號線閘口要到兩點正式通車至開放，我趁機影下d banner閘機指示牌等等既野先：
站內擠滿了人好熱鬧，大家對這新開既二號線都議論紛紛，唔少乘客購買今天才發行既新儲值票，亦有唔熟悉二號線來問路的，客務中心既地鐵職員忙得不可交加。一到兩點，大家都急不及待步進二號線既月台，一睹二號綫既風采。
公園前站以白色為主調：
月台上亦都擠滿人，堆滿在新裝設既屏蔽門 (香港稱為月台幕門) 外，等待住列車既來臨。今天因為係試營運，只會開放首段由三元里站至曉港站，班次為十二分鐘一班。
大家決定先往三元里方向走。列車到達後，焦急既人羣一窩蜂由月台湧入車廂，地鐵職員發出廣播提醒乘客小心屏蔽門。大家隨住人羣迫入車廂，迫到有如在香港返工時間搭地鐵一樣。
新既列車路線圖：
紀念堂站以紫色為主調：
列車到達三元里站後，乘客陸續離開車廂，月台上一下子堆滿了人，之後慢慢散去，但不久又迫滿了候車的人龍。大家o係月台上影過相後，隨住人羣登上了列車，向住另一個終點站—曉港前進。
列車到達曉港後，大家一步出車廂，隨即看到令人掁奮既情景：一架二號線新列車停放o係對面月台既路軌上！呢架新列車剛於十二月中運抵廣州，趕唔切o係今日公開載客，大家能夠一睹新列車既風采，可算是萬幸！新列車以白色為主體，車身中央配以黃色線條，簡潔明快。
新列車謀殺左我地唔少菲林/Ram，影相後大家仔細地睇過月台、大堂既設施，跟住上左往三元里方向的列車，o係每個中途站都停一停，看一看。
二號線每個車站都有彷毛筆字書寫既站名，月台既乘車方向指示牌、出口指示牌、屏蔽門、車站大堂既設計都幾乎同香港地鐵一模一樣，尤其係個別車站大堂既七十一便利店，令人感覺彷似置身香港地鐵一樣，出入閘機就同西鐵將會採用既一款相似。
不過，由月台通往車站大堂、長長既扶手電梯卻係廣州地鐵既特色，個別車站鑽挖得很深，通往車站大堂既扶手電梯又長又斜，有個別車站面積大，由一邊月台通往另一邊月台既通道特別長，呢d都係廣州地鐵獨有既。
隨著列車駛回三元里，今次既廣州二號線之旅已近尾聲，消息指二零零三年六月二十八日，廣州地鐵二號線既服務範圍會由曉港順延至琶洲站，屆時要再來一趟，或者有緣可以搭到二號線的新列車！
傍晚六點幾，我地返回廣州東站，乘搭新時速列車返回深圳，八點幾返到羅湖，跟住一行六人去左上水美心大酒樓打邊爐，十一點幾至拖著一袋二袋行李搭車返屋企。
