唔知係咪琴日辛苦得滯，今日竟然訓到晏晝十二點幾至起身，不過都預左架啦，我地黎 relax既都係想訓多 d，呢個亦係點解我地唔跟團既原因。
點幾鐘離開酒店，肚餓又係食晏既時候，我地去左CITIBANK"搶錢"先，見到對面有間食西餐既 Cafe，上去試下先~~~
Zenga 叫左個意粉套餐，佢話意粉炒燶左少少麻麻地喎，咁又係既，日本仔煮西餐點都唔夠真係搵個西廚返黎煮咁好食架啦~~~
我叫左個 Dessert Tea Set 包兩件 Cake同一杯咖啡又唔錯喎，件Cheese Cake同 Blueberry Cake都幾好味。
Zenga 話我一次過食兩件 Cake咁多要做多 d運動減肥喎，岩啦，日本 d車站個個都咁大，實可以減到肥兼行到腳軟~~~
食完 Tea後，搭地鐵去交通博物館，一定要搭丸之內線至可以o係淡路町站落車，行去最近。
點知...博物館收五點，四點半開始唔俾人入場，我地去到四點九，岩岩過左少少...唔緊要啦，11號再黎過~~~
沿交通博物館向北行，過兩條街就已經係秋葉原區，人地叫佢電氣街，我就覺得似電器城多d...
電器、電腦用品同漫畫店多不勝數，全部都幾層樓高，要行晒真係可以行足一日。
Zenga頭先食唔飽，佢開始有d肚餓，我地去左麥記食燒汁漢堡 (類似香港既將軍漢堡)，佢一邊食一邊讚好味話要再黎~~
呢個燒汁漢堡 (Teriyaki Burger) 用既日式燒汁比將軍漢堡更好味，¥ 159 (約HK$10) 簡直係物超所值。
反而佢新推出既豆腐漢堡我就未試過，我睇 poster 見佢塊豆腐係炸既，我諗會好熱氣。
野飲如咖啡茶一律 ¥130 (約HK$8)，叫茶既話佢會問你要奶定要檸檬汁，水、茶包、奶 / 檸檬汁係分開俾既，即係話你叫茶變相就可以有水、茶、檸茶、檸水同奶茶五種口味任君選擇，日本食肆十居其九都係咁做。
食飽至有力行秋葉原，o係 d商場度四圍打轉，其實我好想買Panasonic果部數碼相機，Zenga叫我睇定d先喎，結果又無買到。
之後搭地鐵去上野，本來諗住去"二木之菓子"買d野食手信，點知間野收六點半咁早，又要11號再黎掃貨...
於是又搭番JR番新宿開飯，o係歌舞伎町有間居酒屋做緊promote，"鉄火丼"(吞拿魚飯)同"海鮮丼"(海鮮飯)做緊特價一律 ¥750 (約HK$48)，試下先...
其實係一個定食，包綠茶、麵鼓湯、前菜同吞拿魚 / 海鮮飯，Zenga個海鮮飯好多海鮮，我個吞拿魚飯成碗飯都舖滿吞拿魚剌身，紅卜卜好新鮮，點少少Washabi黎食，香港果d剌身簡直無得比！
食飽左好滿足咁行番酒店，咁又一日。
