一覺醒來，唔覺肚餓無食早餐，中午十二點半，去左麥記食燒汁漢堡...

今次去池袋酒店附近 Sunshine City 地下街果間，一行入去見到 d無人坐既檯擺晒牌仔，驟眼望落去仲以為有人 Reserve左位...

睇真 d，原來呢間麥記有人帶位架~~！檯面 d牌係話叫你去買野先，稍後會有專人帶位...

我排緊隊既時候，有個 staff拎住部 PDA黎問我食 d乜，我一邊講佢一邊入，之後應該係 send去廚房落 order。

之後o係 counter度又要講多次食乜，原來PDA只係負責落 order，收銀就專做收銀，好處係你未俾錢 d包已經整緊，效率奇高！

話晒都係 lunch，淨食一個包頂一個下晝好似唔夠飽，我叫多左個 pancake，一盒有六件，細細塊好似兒童餐咁，軟綿綿點藍莓醬好好食...！

Lunch 過後，我地搭返 JR山手線去左五反田，另一間網上訂貨既舖頭拎貨，今日落住毛毛雨，天氣好似涼左好多咁...

JR山手線

之後下一點係：後樂園 ~~  聽聞裝修完之後立即變成人氣熱點，梗係要去玩下 feel下啦 ~~ 不過都要轉幾次車...

先搭山手線去目黑，o係目黑站轉地鐵三田線去春日落車，之後由春日站行去後樂園站﹝兩個站打通左﹞！

o係春日站竟然俾我地有新發現 - 有地鐵 2004 年月曆賣！仲要係大大卷果隻，有日本新舊地鐵既對比，舊款車影黑白相，好有懷舊 feel...

最重要既係... 只賣 700 yen！對鐵路迷黎講當然係機不可失，仲要限量 5,000 套，我地慶幸有兩套會帶返黎香港 ~~

最搞笑既係原來買月曆要去站長室度買！哈哈，行到入去站長企晒起身鞠躬，當我地係貴賓咁！﹝當然我知道佢地係禮貌咁做﹞

搞搞下都三點幾四點，又係開 tea既時候，雖然又係去麥記，但係今次試新野，Cafe 冬甩套餐，秋季限定版！

套餐包一個冬甩同一杯野飲，盛惠 390 yen，個冬甩甜甜地，點 d 咖啡醬好好味架！

冬甩好似盒面個圖咁呈扭紋狀，最右邊係附送既咖啡醬，好香咖啡味

日本稍為大間 d既麥記都有 Pasmla 16:9 大電視，播放明星 MTV及廣告

就咁拎住兩卷月曆去後樂園玩，目標係坐摩天輪，之前o係網頁睇過呢個摩天輪有歌聽，可以一邊睇住佢轉一邊聽歌...

不過俾佢屈就攪笑 d，臨上去玩 o係門口幫我地影左張相，之後坐完返落黎要我地俾 1,000 yen佢 "贖" 番張相！

見佢都影得我地幾靚，仲用 Konica相紙，又用硬咭紙摺到好似相架咁，側邊又印晒花，呢 1,000 yen都值得既...

摩天輪既車門位置有幾個掣，用黎開關同揀歌，o係空中聽歌真係好得意，可惜有少少雨，影既相唔係太靚 ~~

高空望落去著晒燈既東京 Dome，大到影唔晒

Zoom 近 d

玩完返到落地面，又周圍影左幾張相：

從底下望番上摩天輪度，好鬼大喔~~

當時落住雨，好多刺激遊戲都無開，我地淨係玩左摩天輪﹝有得坐幸福摩天輪已經好滿足﹞，其實過山車最激，睇下條 track：

穿過商場中間圓圈果條就係過山車既 Track

玩過山車既入口

又影下摩天輪先，遠睇的確好靚：

d燈閃下閃下

著晒燈好鬼靚，隔離好有曲線果條係過山車既 Track

Zoom 近 d淨係摩天輪

變左紫色喎~ 有無留意左下角有d野，果條係過山車既 Track，過山車會在中空的摩天輪中間穿過，正！

商場一攝，中間個水池都唔錯

行行下突然間聽到有音樂聲，原來有音樂噴泉睇：

睇完噴泉後個天都已經全黑， 亦開始有 d寒風吹埋黎幾涷，都係快 d走，搭地鐵丸之內線轉 JR 落巢鷝睇下間舖頭收左未...

營團地下鐵丸之內線車廂外貌

買完衫之後就搭車返池袋食飯，拎住 d野淨係想坐得舒舒服服，我地去左和民，d野仲細碟過香港和民，好似食完無耐就肚餓...

臨返酒店前 o係街口出左名既鬼瓦燒餅買左兩個番薯燒餅上樓做宵夜！                                                                ﹝待續﹞