今日，係悲喜交集既一日，我同 Zenga 有 d不愉快事件發生，不過最後大家坐低傾左一輪，無事了~~~

今朝最早起身架啦，十點半已經行出酒店搵野食，今日落左地下街既 Food Court，發現有間野有小菜食...

我地叫左個糖醋排骨同一個梅子炒飯，排骨細碟左d，但梅子炒飯就好正，飯裡滲出陣陣梅子既香味，又酸酸地好開胃。

食飽就起行，搭地鐵去赤板見附轉車去新橋，再轉百合鷗號列車往台場。

百合鷗號列車：

車廂內貎：

台場係一個小島，內有沙灘，有彩虹橋東京灣等美景，有日航東京酒店，也有購物中心，許多電訊公司的總部也設在此。

我地在海濱公園站落左車，隔離係一個購物中心，裡面有間好大既"世嘉" Game Centre 叫 "JOYPOLIS"。

裡面有好多機動遊戲，我玩左賽車，奇趣水族館等，又影左貼紙相。

JOYPOLIS 隔離有個"台場小香港"，將香港最有特色既一面顯露出黎。

"東京皮蛋城"原來係一間機鋪！

d招牌熟口熟面吧~~~裡面仲有鋪頭幫人睇風水添...

唯一一間茶樓 -- 鴻星海鮮酒家...

我地o係呢度一間粥麵店食粥食麵，難得食到皮蛋 (無瘦肉)粥同墨丸麵。

之後行番出台場海濱公園，個沙灘好靚，仲可以望到彩虹大橋：

沙灘附近既景色：

仲有個女神像：

站o係可以望住彩虹橋既沙灘，最好就係同最心愛既人一齊o係沙灘度漫步，但係今日既佢有 d唔妥，只顧自己一路行開去。

我唔知發生咩事，但真係有 d唔開心。

行行下已經係下個車站台場站，我地搭番百合鷗號繼續向前行往有明站。

經過國際展示場站：

有明站附近有座 Building，門前有噴水池，踏正00分會噴出35米高既水柱，反正黎到就想睇下。

去到有明，未見噴水池之前反而見到 Panasonic Centre：

我第一時間入去睇下我想買果部數碼相機，但係 d sales 唔多掂，做野又慢，又拎錯 catalog...

算啦都係唔買住啦，時候都唔早，Zenga 話想返銀座去 Sony Building 買野喎。

搭番車落銀座，入到 Sony Building 發覺買野比香港平，當然又掃貨啦...

Sony 個 sales 哥哥見我拎住張地鐵路線圖問我去邊，仲教我點去東京鐵塔添。

買完野就繼續去下一站 -- 東京鐵塔。

今次都係搭地鐵，但搭日比谷線，首次發現有幕門：

唉~~ 俾個哥哥仔老點左添，由御成門站行過去都幾遠架...

過馬路既時候，我見到係綠燈，但係旁邊有車轉緊過黎，又有個男人企響隔離，我見佢唔過 (馬路) 我又唔過。

Zenga 行過黎好大聲咁話："綠燈呀你企o係度做咩呀？"

"我見隔離個男人唔過我咪唔過囉，旁邊有車轉過黎丫嘛..."我解釋。

"人地唔係過馬路架，你綠燈行過去 d車會停俾你家嘛..." 佢好勞氣咁話。

頭先 o係台場佢唔出聲都算勒，而家又咁大聲話人算點喎...

都唔知佢個心諗緊乜既，我同佢講乜都無 response，好似同空氣講野咁好無癮......

佢行前我跟尾，我突然間覺得我地o係條街度行好似兩個唔識既人咁...

人地做情侶既就算唔拖手都會搭下膊頭，偶爾都會喁喁細語，邊會好似我地咁架...

我唔知發生咩事，我覺得由台場到而家佢都好似自己顧自己咁，有時佢行得太快我跟唔切佢都唔會擰返轉頭望我一眼。

我地識左咁耐佢從未試過好似今次咁大聲咁鬧我，我覺得好難受好心痛，甚至恐懼 / 害怕 / 擔心佢係咪已經唔再愛我。

我唔知自己做錯左 d乜，佢唔出聲我又唔知佢諗緊咩野，大家中間好似有道牆隔開左咁...

上到鐵塔我一路都唔開心，影既相亦都唔靚，相比之下上次去澳門旅遊塔開心得多。

返落地面離開鐵塔後，要行一段路至去到地鐵站，佢又照舊粒聲唔出，我覺得呢條路好漫長......

我地搭地鐵日比谷線返銀座食飯，去左食西餐鋸扒，我嘗試開口講野，依然無任何 response，大家唯有繼續沉默，我好無奈，相反隔離檯果兩個師奶就雞啄唔斷，幾大對比。

搭返丸之內線返到酒店，我地兩個都訓唔著，我先開口問佢發生咩事，之後一發不可收拾喊到數唔到聲。

兩個人用晒一卷廁紙，良久之後大家都平伏落黎，原來佢覺得我個 schedule 出左問題。

佢覺得去好多地方都好似好趕咁，佢認為我之前黎過應該會 plan 得好d，應該唔會咁喎~~

我對上一次黎已經係七八年前既事，當年既鐵路 network無咁大無咁多 interchange，又無咁多新樓，今次過黎根本要重新適應。

另一樣野，佢話唔知係咪近排公司多野做個人變得心急，有時會覺得我做 decision making太慢。

例如食野睇好耐 menu都揀唔到，買野要睇好耐咁。

呢個我承諗，或者係女人天性卦，以買衫為例，女裝有裙有褲唔同 cutting唔同款，唔似得男裝 T-shirt恤衫西褲牛你褲搞掂晒。

男人買野一早諗定要買乜至行入去，唔似得我地女人咁行到入去至逐件睇...

呢個我可以將自己 fine tune，但我知自己眼力唔好有時反應會慢 d遲鈍 d，亦希望佢諒解。

我覺得今次係上帝俾我地既考驗，經過今次，我覺得我地更了解對方。